|
Foreningslivet
ruslar og går i kommunen sjølv om vi ikkje høyrer
så mykje til det. Ei forening som ikkje ropar så høgt
er Husflidslaget. Dei er kjent for sine julemesser på Heggheim,
men gjennom heile året er dei aktive.
-Det er mange
som trur at vi er så flinke til alt, men det er slettes ikkje
sant. Vi treng å lære nye ting, og vi har og mykje vi
kan lære av kvarandre, seier Hanna Opstad som har vore leiar
i Midsund Husflidslag i mange år og er ei av dei som har vore
med frå starten i 1988.
Mellom 15 og 25 kvinner møtest kjellaren i Nord-Heggdal barnehage
på desse møta. Då Øyavis var innom var det
malekveld og dei flottast bilde vart produsert under rettleiing av
Karin Heggdal. Vidare er det planlagt eit kurs i kakepynting og ein
kveld er avsett til å male på tre.
Midsund Husflidslag har no 28 medlemmar, men det er ønskjeleg
med fleire. -Ja, dersom nokon er interessert å vere med er det
berre å møte opp i barnehagekjellaren i Nord-Heggdal
og sjå kor triveleg vi har det. Ellers er alle møta våre
opne for alle, seier Hanna.
Sidan det vart stifta i 1988 kan og laget feire 20 års jubiuleum
i år. -Det kom plutseleg eit kort i posten og gratulerte med
jubileet, men vi har ikkje planer om noko feiring. Vi møtest
om lag ein gong kvar fjortande dag. Enten har vi eit eller anna kurs
og lærer oss noko nytt, eller så kosar vi oss med handarbeid.
Vi har det i alle fall svært triveleg i lag, seier Hanna.
I Øyavis sitt desembernummer i 1988 kan vi lese at Midsund
Husflidslag vart stifta søndag 20. november på Nord-Heggdal
skule. Ved stiftinga var det 11 medlemmar og det vart valt eit styre
på fem. Til leiar vart valt Torill Rakvåg, nestleiar og
kasserar vart Anne Kjerstin Heggdal, sekretær Sølvi Nygård
og styre¬medlemmar Hildrun Nygård og Edny Raknes Reiten.
Vidare vart medlemskontingenten bestemt og husflidskonsulenten i fylket,
Marta Soldal, informerte om organisasjonen.
Labbar til dei
nyfødde
I Husflidslaget fekk dei ideen om å lage labbar til alle nyfødte
barn i kommunen. Og det var ikkje vanskeleg å få flittige
hender til å lage dei. No har dei laga 37 par, alle har husflidlaget
sin logo, ei åttebladsrose framme på rista, og dei er
no levert i ei fin fletta korg til helsesøster Guri Klauset.
-Guri tek med seg korga når ho er på sitt første
besøk, og dei får då velje seg eit labbepar frå
korga, seier damene i husflidslaget som synes dette var ein kjempegod
ide.
Den kvelden Øyavis
var innom var det kurs i akrylmåling. Rundt bordet sit Sølvi
Nygård, Målfrid Gangstad, Hildrun Nygård, Petra
Rakvåg, Magny Klauset, Anne Jørgensen, Bente Isaksen,
Janne Svendsen, Ingveig Magerøy, Tone Uran Opstad, Laila Gangstad,
Mildrid Bjørnerem, Hanna Opstad, Kristi Jenset, Marie Tholvsen
Nygård, Reidun Solberg, Svanaug Rakvåg og Karin Heggdal.
|
Dei fem
i Husflidslaget som har laga labbane: Bak Tone Uran Opstad og Hanna
Opstad. Framme Laila Gangstad, Ingvild Magerøy og Mildrid Bjørnerem.
|
