ØYAVIS - lokalavis for Midsund</font></b>

Striden kring Ugelvikhamna blir anka til lagmannsretten etter at Romsdal Tingrett på formelt grunnlag avviste å realitetsbehandle saka.

Romsdals Tingrett hadde saka oppe i januar og konkluderte med at tvisten var reist for feil domstol. I følgje kjennelsen skal saka løysast ved voldgiftsrett og ikkje i det ordinære rettssystemet.
-Vi meiner dette er feil og har påkjært avgjerda i tingretten, seier Egil Wold som er advokat for grunneigarane. Det betyr at saka endar i Frostating Lagmannsrett.
- I slike gamle avtalar er voldgiftsrett ofte brukt for å løyse stridsspørsmål, seier Sverre Larhammer som er advokat for småbåtlaget.

Langvarig konflikt
Striden i Ugelvikhamna blussa opp i 2004. I 20 år hadde Ugelvik småbåtlag hatt avtale med grunneigar om å leige grunn til landfeste og utlegg av flytebryggjer. Mot slutten av avtaleperioden var partane i dialog om forlenging av avtalen. Etter det vi kjenner til ville grunneigar ha ei årleg leige på 15.000 kroner, noko båtlaget ikkje var villig til å betale.
Samstundes var Ugelvik Småbåtlag i dialog med Kystverket om å flytte flytebryggjene inn på området som Kystverket disponerer til fiskerihamn. Dette fekk dei lov til på visse vilkår, mellom anna at dei hadde nødvendig samtykkje frå grunneigar og andre rettigheitshavarar.
I 2004 vart flytebryggjene flytta og nytt landfeste laga.

Rettsak
Grunneigarane meinte at Ugelvik småbåtlag uansett om dei flytte inn på området som Kystverket disponerte, måtte ha løyve frå grunneigar. Dei hevda også at ein del av hamneanlegget framleis låg utanfor det området som Kystverket har disposisjonsretten til.
Dei tok difor ut stemning mot Ugelvik Småbåtlag for å få striden avgjort i retten. Grunneigarane kravde at småbåtlaget måte betale 500 kroner per båtplass frå 2004, samt flytte frå området.
Småbåtlaget på si side meinte at retten burde avvise saka. Dette grunngav dei med at det i grunneigarerklæringa som vart inngått i 1967 då Kystverket fekk begrensa rett til å bruke området til fiskerihamn, var teke med eit punkt der det heiter at tvistar som oppstår skal avgjerast av ein voldgiftsrett.
Saka var oppe til behandling 9. januar.

Kan ikkje avvisast
Grunneigarane sin advokat hevda i retten at saka ikkje kunne avvisast fordi voldgiftsklausulen regulerte forholdet mellom grunneigar og Kystverket og ikkje forholdet mellom grunneigar og Ugelvik Småbåtlag. Vidare viste han til at anlegget er lagt delvis utanfor området som er omfatta av grunneigarerklæringa. Han held difor fast på at Ugelvik Småbåtlag ikkje har rett til å legge ut flytebryggje med landgang utan grunneigar sitt samtykke. Det dei har gjort er krenking av grunneigar sin eigedomsrett, hevda han, og ba om at saka vart realitetshandsama.

Voldgift
Ugelvik Småbåtlag meinte at saka måtte avvisast og viste til grunneigarerklæringa der det heiter at usemje skal avgjerast ved voldgift. Dei avviser også at anlegget ligg utanfor området som er omfatta av grunneigarerklæringa. Men uansett vil dagens plassering ikkje krevje samtykkje frå grunneigar, meinte Sverre Larhammer som er advokat for småbåtlaget.

Avviste saka
Dommarfullmektig Øyvind Panzer Iversen som administrerte retten har konkludert med at voldgiftsklausulen i avtalen mellom Kystverket og grunneigarane må vere bindane også i forholdet mellom grunneigar og Ugelvik Småbåtlag. Han avviser difor saka og meiner den må til voldgift. Dermed kom ikkje realitetane i saka opp til behandling i tingretten.
Ein voldgiftsrett er ein særdomstol som vil bestå av Sorenskrivaren i Romsdal samt ein representant frå kvar av partane. Men om saka endar der, er enno uvisst. Spørsmålet er kva Frostating Lagmannsrett måtte meine.

Sakskostnader
Tingretten påla også grunneigarane å betale sakskostnadene til motparten med i alt 40.000 kroner. I følgje dommaren er dette i samsvar med tvistemålslova.